Author Interview: Boon Lauw, Salanga Prize Winner 2020 (2 of 2)

Narito ang part 2 ng panayam kay Boon Lauw. Si Boon ay ginawaran ng 2020 Salanga Prize para sa kanyang kuwento, Team Abangers at Ang Estilong Turumpo. Basahin ang part 1 ng kanyang interview sa link na ito. Panoorin ang kanyang panayam sa Lock N Roll: PBBY Edition kasama si Jun Matias at si Tori Tadiar, ang nagwagi ng 2020 Alcala Prize. 

3)    Ano ang aklat pambata na sana ay ikaw ang nakapagsulat?

·      Sa totoo lang, hindi ko sigurado ang isasagot dito. Kasi, ewan, wala akong pinanghihinayangang kuwento na nagustuhan ko. May kani-kaniyang boses at pamamaraan ang mga manunulat—‘yon ang maganda sa mundo ng pagbabasa. Kaya hindi ko maisip na sana ako ang nakapagsulat

·      Kung kailangan talaga ng sagot (haha), siguro ‘yong sistema na lang ng mahika na gamit sa libro ni Brandon Sanderson na Mistborn. Sa kuwento kasi na ‘yon, ‘yong mga Allomancer (may kapangyarihan) ay umiinom ng maliliit na piraso ng bakal. Pagkatapos, sa tuwing gagamit sila ng kapangyarihan, iko-consume nila ‘yong mga bakal na nakaimbak sa tiyan nila. Siyempre, iba’t ibang uri ng bakal ay may iba’t ibang uri rin ng binibigay na kapangyarihan. Napakasimple lang kung iisipin saka napaka-cool ng tema (metals). Pero, ayon nga, tama lang na siya ang nagsulat dahil na-enjoy ko nang husto ang pagbabasa nito.

4)    Payo o tips para sa mga gustong magsulat ng kuwentong pambata.

·      Una, sa pagsusulat muna. Kapag nagsisimula ka pa lang, gaya ko, magsulat ka muna para sa sarili mo. Bahala silang lahat—anong pake nila sa trip mo. Ikaw ang una mong mambabasa. Dapat gandang-ganda ka sa isinulat mo. Kung hindi pa, e di, ayusin mo pa. Pramis, hindi malilimutan ang karanasan sa pagsisimula ng pagsusulat. Walang kapantay ang saya na makatapos ka ng isang kabanata, talata, o maikling kuwento. Huwag mo munang ibatay ang self-worth mo sa komento ng iba. I-enjoy mo muna. Kapag naabot mo na ang ceiling mo, ibig sabihin hindi mo na kayang mag-improve mag-isa, saka ka humingi ng opinyon ng iba.

·      Sa pagsusulat naman ng kuwentong pambata, lalo na sa children’s at middle grade, mas maganda kung may nakakasalamuha ka o may mga alaala ka ng paraan ng pananalita at pagkilos ng mga batang isusulat mo. Napakahirap isulat ng librong pambata—kasi di na tayo bata. Kaya saludo talaga ako sa mga nakakakuha ng boses ng bata.

Author Interview: Boon Lauw, Salanga Prize Winner 2020 (1 of 2)

Narito ang isang panayam kay Boon Lauw na nagwagi ng Salanga Prize 2020. Iginawad ang parangal kahapon sa virtual awarding ng Philippine Board on Books for Young People (PBBY) sa Facebook. Pagdiriwang ng National Children's Book Day kahapon at mapapanood ang video ng awarding ceremonies sa FB Page ng PBBY.

Samantala, kilalanin pa natin si Boon Law sa panayam na ito.

   1)    Sino at ano ang inspirasyon mo sa pagsusulat ng kuwento ni Tala at ang tropang Abangers?

·      Nabuo ang kuwento nina Tala at ng tropang Abangers dahil sa alaala ng pagbisita ko sa isang bahay ampunan sa QC. Sinamahan ko kasi ang girlfriend ko pati na ang pamilya niya sa paghatid ng foster child na nanirahan sa kanila pansamantala papunta sa forever family niya.

·      Habang naghihintay na matapos ang sangkatutak na mga proseso at papeles, tumambay muna kaming tatlo sa loob ng compound kung saan ay mayroong malaking playground sa gitna.

·      Naglaro kami at nagpalipas ng oras. Hanggang sa ilang minuto pa, may dumating na isang batang lalaki. Nakauniporme siya at mukhang kagagaling lang sa school. Napansin kong nagmadali siyang iwan ang mga gamit niya sa parang dormitoryo nila saka lumabas ulit para pumunta sa playground.

·      Noong una, nginitian lang namin siya. Hindi naman siya nakipag-usap sa amin. Sinundan-sundan lang niya kami saka sinubukan ang lahat ng palaruan sa paligid namin. Sa tuwing matatapos kaming gamitin kunwari ang slide, siya agad ang papalit at ipapakita sa amin ang mga talento niya. Saka lang namin napagtanto na nagpapakitang-gilas pala siya.

·      Kaya kinausap siya ng girlfriend ko at tinanong-tanong. Nalaman tuloy naming Grade 6 na siya at matagal nang naninirahan sa bahay-ampunan.

·      Noong paalis na kami at nagpaalam na sa kanya, napansin ko ang bahid ng pagkadismaya sa itsura niya. Tumigil na rin siya kaagad sa paggamit ng mga laruan saka bumalik sa dorm. Hindi ko malilimutan ‘yon. Hindi ko rin malilimutan ‘yong paninikip sa dibdib ko na gusto ko sanang matulungan siya.

·      Kaya noong napagtripan kong magsulat ng middle grade na libro dahil gusto kong magpaturo sa mentor kong si Xi Zuq kung paano magsulat ng boses ng bata, ang alaala niya kaagad ang pumasok sa isip ko.

·      ‘Yong tema naman ng mga Larong Pinoy ay nagmula sa mga masasaya at di malilimutan kong alaala sa klase ni Titser Jo-ann Grecia noong college (PE2-Philippine Games). Hanep kasi ‘yong energy at enthusiasm ni Ma’am, nakaka-infect. E lumaki rin ako sa mga larong pinoy. Kaya ayon, medyo naging automatic ang pag-click ng tema sa naisip kong mga karakter.

·      Naalala ko noong gabing nagbi-brainstorm kami ni Xi Zuq, isang upuan lang naisip ang buong libro—saka naisulat ko kaagad ang unang kabanata. Mas tumagal pa ata kami sa pag-iisip ng akma na pamagat. Gano’n kabigat ang epekto ng mga alaalang pinanghugutan ko ng kuwento para sa Team Abangers at Estilong Trumpo.

 2)    Ano-anong 5 aklat pambata ang nagka-impact sa buhay mo at bakit?

·      Una, ‘yong seryeng The Hardy Boys. Maalala ko dati ang bonding namin ng nanay ko sa tuwing mapapadaan sa mall ay ang bumisita sa mga booksale. Siya, maghahanap ng pocket book. Habang ako naman, maghahalungkat para mahanap ang mga kulang kong numero sa serye na The Hardy Boys. Dahil sa seryeng ‘yon ko unang nakahiligan ang pagbabasa.

·      Pagdating ng highschool, nabinyagan naman ako sa Harry Potter series at napabilang sa mga nag-aabang taon-taon para sa updates ng libro. Nanghihiram lang ako no’n. Hindi pa kasi namin kayang bilhin ang mga libro.

·      Noong magkolehiyo naman ako saka medyo nakagaan na kami kaunti sa buhay (kaya nang bumili ng libro), kabilang sa mga humulma ng panlasa ko sa mga kuwento ang mga seryeng The Secrets of the Immortal Nicholas Flammel ni Michael Scott at Ranger’s Apprentice ni John Flanagan.

·      Noong maka-graduate naman, nakahiligan ko ang mga akda ni Brandon Sanderson—lalo na ang The Reckoners series niya at Mistborn series. Dahil sa mga libro niya, naisipan kong pangarapin ang pagiging manunulat. Para sa akin, siya at ang antas niya ang goal ko.

·      Napakalaki rin ng impact sa akin ng mga akda ng mentor kong si Xi Zuq, lalo na ang serye niyang Supremo. Dahil sa mga libro niya, napamahal ako sa wikang Filipino. Dati kasi, naiintimidate ako sa mga Filipino books dahil sa lalim ng mga salitang ginagamit (hindi ko first language ang Filipino). Pero nang sinubukan kong basahin ang libro niya, hindi ako nahirapan. May iilan pa ring malalim na mga salitang hindi ko alam, pero madali ko itong naiintindihan dahil sa konteksto. Pakiramdam ko habang nagbabasa ay approachable o welcoming ang libro. Kaya target ko namang maabot ang tatas niya sa pagsusulat sa Filipino.

·      Ayon, kung mapapansin ninyo, puro serye ang mga binabasa ko. Kaya ‘wag na kayong magtataka kung puro serye rin ang mga isinusulat kong nobela (kung sakaling mailathala). 

ANNOUNCEMENT: The PBBY Salanga Prize Winner for 2020

This year’s grand prize winner of the PBBY-Salanga Prize is Boon Kristoffer Lauw for his novel, Team Abangers at ang Estilong Trumpo. For the first time in the history of the prize, the contest was open to chapter books. Lauw’s winning piece is about an orphan who plans to join the televised Laro ng Lahi contest to help her locate her parents.

Aside from Lauw, two other writers won in this year’s prize, both garnering honourable mention: Raissa Rivera Falgui and Tamara Eriel Mosqueda.

Lauw, who hails from General Santos City, is a chemical engineer currently teaching ADTech2 at the Philippine Science High School. He took part in the 3rd Amelia Lapeña Bonifacio Writers’ Workshop last 2018 and was also part of the UP Likhaan Institute of Creative Writing. This is his first PBBY-Salanga Prize.

Lauw will be awarded at the 37th National Children’s Book Day celebration on July 21, 2020.

For inquiries about the contest, contact the PBBY Secretariat through telephone 8352-6765 loc 204 or email secretariat@pbby.org.ph.